小鳳姐2016新動態                      

小鳳姐2016香港演唱會媒體報導 2

本網站某些圖片內容之連結,版權全屬有關該機構等持有..

本網站只作友善借用,絕無涉其它商業或作不良用途。特此鳴謝!

-------------------------------------------------------------------------------------------

2016- 5-29:東方日報--買磚頭當投資!徐小鳳唔否認擁12個物業

【on.cc東網專訊】 殿堂級歌手徐小鳳7月將再在紅館舉行演唱會,最近她接受電台錄音訪問,談到自91年寶麗金時期《文明淚》專輯,她超過20年不曾推出過新專輯,她深表歉意地說:「喺呢度要對歌迷講聲抱歉,其實我一直儲咗好多歌,也一直物色跟我理念相同嘅唱片公司,可惜暫時未找到。我係一個唔鍾意被管束嘅人,當轉到新公司時,便要受到其文化影響,我只係想自由地選擇自己喜愛唱嘅歌,希望呢間公司快啲出現!」
買衫快過揀歌
徐小鳳曾於電影《最愛女人購物狂》演出「殿堂級購物狂」角色,原來,她笑言片中的對白與她極為相似,她說:「我買衫嘅速度會好快,因為冇時間,睇中啱嘅款式,就『呢件…呢件…呢件…都要』哈!揀歌都係一樣,我會話要呢首、嗰首⋯⋯但當然唔似揀衫咁快,因為揀擇歌時要用心、培養感情嘅。」
鍾情買磚頭
主持人笑指小鳳姐購買服裝富爽,與其被指有富婆的身家有關,談及有指小鳳姐名下有十二個物業,她一貫風趣幽默,又沒有正面否認說:「其實只係12個窗口啫!」原來她也曾投資股票,但曾投資失利及吸收朋友中的經驗,令她只鍾情購買磚頭,小鳳姐說:「我唔係一個好嘅投資者,第一次買股票令我從高峰跌落嚟,自此之後,我就怕咗。因為投資需要鑽研嘅,眼見身邊朋友好緊張,當年call機仲係好盛行嘅時候,佢哋24小時都拎住,冇時間同你講嘢,所以我對自己講唔可以咁樣,亦因此錯失咗唔少投資機會。其實我嗰啲物業,有唔少係用嚟儲存我啲衫嘅,哈!」
從未諗過退休
95年,徐小鳳一度暫別樂壇十年,當時也曾有指她賺夠退休,但她表示她的字典一直沒有「退休」這兩個字,她說:「我呢個人工作狂,我抗拒『退休』呢個詞,反而會用『休息』代表。我認為仍然有能力工作時,點解要停低?點解有能力時,唔繼續工作同貢獻呢?如果覺得攰嘅,可選擇休息。」她對一些長期朝九晚五上班的人感佩服:「我長期做都唔得,要做一陣、停一陣咁樣先啱我性格。」

-------------------------------------------------------------------------------------------

2016- 5-20:頭條日報 天天娛講——有請小鳳姐

小鳳姐屬殿堂級歌手,7、80年代紅極一時,之後雖然淡出樂壇,但年輕人對佢嘅歌絕對唔陌生,一首《喜氣洋洋》就深得後生仔歡心,由頭唱到尾都完全無問題,而小鳳姐雖然將近70,但絕對唔離地,早前就出席某網台的「分獎典禮」,同一大班觀眾一齊玩,跟得好貼㗎。
  其實小鳳姐一向玩得,經常妙語如珠,又唔介意畀人笑自己嘅打扮,仲鍾意玩自嘲,真係好鬼可愛嘅啫,見我讚得咁厲害,行家前輩贈我一單小鳳姐笑料,「有圈中人要搵一位徐小姐,唔覺意撳錯打咗畀小鳳姐,因為圈中人有急事,所以電話一通就係咁講無停過,而小鳳姐亦無叫佢收口,對方終於肯停,小鳳姐笑笑口咁講︰『我係徐小鳳,唔係你所搵嘅徐小姐,你打錯呀,不過見你咁急,我唔罰你啦。』」之後圈中人當然狂講唔好意思,小鳳姐繼續嘻嘻笑又淡淡然咁話︰「你快啲打返畀你想搵嘅徐小姐啦。」
另外,「徐小鳳演唱會2016」將於7月尾舉行,經常「勞煩」小鳳姐的朋友,買飛入場支持吓呀喂。

-----------------------------------------------------------------------------------

2016- 5-18:口水多過浪花  今集嘉賓「徐小鳳」

---------------------------------------------------------------------------------

2016- 5-5:講東講西 (星期一至五) 不如有請小鳳姐

            主持: 劉天賜、鄧達智嘉賓: 徐小鳳、黃淑儀、黃惠康

 

7月28日至8月2日,會否加場延期未知,小鳳姐2016演唱會棄用幾乎為她而設的「金光燦爛」,

改用叫來似乎字多略長的口號,喊過,即記住,深具小鳳姐嗒落有Gag味:

既然青春留不住,不如有請小鳳姐!
以從前穿上經典白底黑波點魚尾裙之青春艷照vs也是白底波點魚尾裙之今天沈澱照片,宗旨一條:
青葱不再,歲月活入這位經典中的經典,青春二字已非數字解碼,讓她的歌,讓她的舞台風采印證時光未流逝,永恆歸於小鳳姐。
不等七月廿八,星期四今晚,香港電台「講東講西」,有請小鳳姐!
而她,又請黃淑儀Gigi姐,相識於少女時代的好朋友,與加拿大剛剛回來講主賜官並我們笑談數十寒暑歌壇,趣談人生百態。
黎明被封金句之王,金句之后?
歌壇除了一個徐小鳳,只有一個徐小鳳。
或許,相信她更接受被封「Gag句之后」。
無他,轉數如此快,如非舞台上面對萬千觀眾與報導媒體,以防萬一,句句為營。步下歌壇,回到生活上的她,談笑風生,幽默連場……原則:樂而不淫,堅持優雅。
她未必在乎那點普通的金句封后。
絕配Gigi、小鳳一雙姊妹花,棟篤笑優材,雅俗共賞談笑風生叫同枱一眾笑攤腰!
突發奇想,不如演唱會上來一段棟篤笑環節?
徐小妹妹Mimi即笑答:今時今日觀眾會得計算台上歌手唱了多少首歌!
我們會從另一角度想,徐大小姐上台那會將歌唱得少?
大部分歌手台上單一唱歌便好,無謂Dry得很的Dry Talk。
相反,深知偶像精華鳳絲們(小鳳姐骨灰粉絲)要求加插幽默談笑片段,才更覺值回票價。
 
鄧達智

--------------------------------------------------------------------------------------

2016- 5-3 : 小鳳姐未夠廿四小時尋回五個小朋友....

 

-------------------------------------------------------------------------------------------

2016- 5-3 : 小鳳姐尋人 約「裙下之童」紅館再聚

殿堂級歌手徐小鳳曾在紅館創下43場演唱會紀錄,7月底將再於紅館舉行「徐小鳳演唱會2016」,早前於個唱記者會上,大會特別將歷年徐小鳳的造型照砌成「回憶牆」,連她接受《東網》專訪時亦不禁笑道:「估唔到試過咁多造型,原來咁勤力!(當年係時裝女王?)睇番啲相又幾潮。」講到波點裙成為歌迷至愛,而巨傘裙更變成招牌造型,她說:「少少啦,平時冇機會着嘛。(着迷你裙出動?)咁我情願跳舞!」

最驚燒親裙底小朋友

提到巨傘裙,自然想到其巨型燈泡裙內「捐」出小朋友的經典場面,徐小鳳更自爆1987年演出時的驚險一幕:「嗰次條裙突然火燭,好驚好驚,因為係燈泡燃燒咗,啲絲絨又好易着火,好危險要即刻喺台上除,啲觀眾仲以為我除衫,點知我原來仲有條裙。(當時On Show?)係,唔除唔得,怕辣親啲小朋友。」

相隔29年後,徐小鳳希望能再與10名「裙下之臣」於紅館見面,她專登拍短片「尋童」:「如果你仲記得喺我大裙底捐過出嚟嘅小朋友,今日你已經長大成人,請你出現喺我今次演唱會舞台上,我等你哋。」還剪輯了精彩「捐裙底」一幕,片中徐小鳳大叫「作動要生」,隨即「捐」出10個穿波點衫的小朋友,場面震撼,當她問:「入面焗唔焗呀?」小朋友齊聲說:「焗!」相當搞笑。

-------------------------------------------------------------------------------------------

2016- 4- 23/30: 小鳳姐2016演唱會⋯地下鐵及明周廣告

--------------------------------------------------------------------------------------------------

2016- 4- 25: 梁麗翹爆徐小鳳想人哋叫佢做鳳妹

【on.cc東網專訊】 無綫節目《一線娛樂》主持梁麗翹(Nicole)、衞志豪、周奕瑋及謝文欣訪問資深歌手徐小鳳,兩位女主持特地模仿小鳳經典造型,加上吹了蓬鬆髮型,扮得唯妙唯肖,氹得小鳳非常開心!Nicole說:「我哋問佢想大家叫佢做Paula、小鳳姐定小鳳BB,佢話自己係鳳妹,佢真係好幽默,同埋係一個時代嘅Icon,最深刻梗係佢套波點衫啦!好開心今次我可以扮佢然後合照!佢嘅裙都好修腰,我當然有把握機會問佢點Keep住條蛇腰啦!」Nicole又表示幾位主持於訪問前狂聽徐小鳳金曲,不停自High及瘋狂自拍,心情極興奮。

--------------------------------------------------------------------------------------------------

 

2016- 4- 20《徐小鳳演唱會2016》記者會

 

【on.cc東網專訊】 殿堂級徐小鳳為7月28日至8月2日在紅館的《徐小鳳演唱會2016》舉行記者會,現場以小鳳姐歴年的相片及唱片封面做布景,回顧小鳳姐多年來的不同造型。小鳳姐以紅色魚尾裙現身,由於圓形裙襬超巨型,被司儀鄭丹瑞笑問有否「卡住」走廊,引得小鳳姐都大笑。

講到喜歡當年哪個造型,小鳳姐坦言很花心,個個都喜歡,又笑言難忘廿多年前的黑色波點裙,當時裙堥咱X大班小朋友,笑謂很想那些小朋友今次可以再來。

今次個唱宣傳語句為「既青春留不住,不如有請小鳳姐」,對此她謂:「係大會諗嘅,因為有青春呢個字,我足足諗咗三日,而我境界唔係睇表面,而係睇心境,留得住心情,嚟對付留不住嘅青春。」

細膽唔敢拍拖

現場播放多位歌手如容祖兒、楊千嬅、梁漢文、蘇永康及Twins給小鳳姐的提問短片,當中問到小鳳姐可有拍拖,小鳳姐笑言:「我不斷都有拍拖,我拖友就係我歌迷,其實我好羡慕人拍拖,有好好先生,有好太太,兒女成群,但我呢方面好細膽,怕玩得太大,辜負咗人哋美意,亦好怕人等我,千祈唔好等我,等人好辛苦。」而一班「古惑佬」,包括錢嘉樂、鄭伊健、謝天華、林曉峰及陳小春,則拿小鳳姐的歌曲《叉燒包》搞Gag,問小鳳姐愛吃甚麼包?之後嘉樂仔即謂一定是「上海包」,更玩歪音唱成「想開包」,笑爆全場。

首條波點裙變童裝

小鳳姐受訪時,被問到演唱會是否會有波點裙造型?小鳳姐說:「又要造一套新喎,每次都有造。(第一條波點裙有冇keep起?)都有,但已經變童裝,之後嗰啲又大又細又中碼都有。」談到小鳳姐上次為林子祥個唱任嘉賓,今次可會搵番阿Lam撐場,對此她謂:「隨緣,唔鍾意勉強人。(阿Lam早瞓,你安排前啲位置佢唱就得)咁開日場畀佢早啲到,對得住佢啦!」問屆時可會展示小鳳姐棟篤笑本領?她謂:「我真係唔覺好笑,自己講嘢自娛吓自己咋!」

徐小鳳繼前年在紅館舉行「走過順流逆流依然金光燦爛」演唱會後,噚日宣佈將於7月28日至8月2日在紅館舉行六場演唱會。近年小鳳姐應該好唔得閒,事關社會上發生太多蝦碌事,網民成日要「請小鳳姐出場」嘛,爛gag嚟。不過,小鳳姐今次真係出現喺《蘋果》「人人問小鳳」環節,仲回答老中青歌迷嘅問題添!究竟佢總共有幾多套波點裙同點打理呢?打牌試過最大食幾多番?平日行街買嘢又會唔會好似《最愛女人購物狂》入面嘅佢咁,唔睇價錢牌狂掃呢?

容小姐問:過去有很多人模仿你,其實你介不介意?
答:其實起初有少許介意,後來我又覺得開心,現在變了完全唔介意。

夏先生問:我想知小鳳姐波點衫有幾多件?通常會拎去乾洗?件波點衫還在嗎?
答:部份波點衫我係保留嘅,如果佢冇破爛嘅話,同埋會用特別清潔方法去洗。

李先生問:我後生時好喜歡聽你的歌,可否即場獻唱幾句名曲畀我哋聽?
答:先生請問你幾多歲,你後生嗰陣係幾時(笑)?熱烈地彈琴熱烈地唱,歌聲多奔放個個喜氣洋洋。

陳小姐問:我想問人生吃過最大一鋪牌係幾多番,收幾多錢?
答:好似都有五十幾番,係好少錢好少錢,但嗰次次後,我就冇食過糊。

陳小姐問:小鳳姐,邊個翻唱你嘅歌最好聽?
答:都有好幾位。當然如果以出位來說都應該係阿梅。

Irene姨問:你條22吋腰係點樣keep?
答:嗰陣時真係咩都唔食,依家最唔好就係咩都食。

盧小姐問:我想問你喜歡穿小鳳仙裝嗎?同埋喜歡食鳳仙雪條嗎?
答:幾好喎,黃色嗰隻吖嘛,鳳仙雪條。其實我最近食嗰隻士多啤梨,唔係,黑加侖子,但唔係成日買到。

吳先生問:你喺《最愛女人購物狂》入面扮演富婆,現實中係咪都係咁買嘢?
答:唔係。睇吓買乜嘢,我又唔係咁誇張去買嘢,但我個心想架(笑)。

吳先生問:小鳳姐你鍾意陸小鳳抑或王小鳳呀?
答:總之小鳳我都鍾意。

蕭先生問:小鳳姐,你覺得邊個扮你最似?
答:如果形象扮,我覺得戚美珍好似。

盧小姐問:Hi,小鳳姐,平時有冇打開牌?打開幾錢底?
答:我冇玩呢個遊戲好多年,超過三十年,忘記呢個遊戲咁滯。朋友話點玩我就點玩。其實係儍,唔應該咁。

陳小姐問:小鳳姐,平時口痕會唔會唱K?
答:好少,因為我鍾意唱現場,有樂隊伴奏。

周先生問:當年你連開幾十場演唱會,為何體力上可以應付到?
答:其實我都唔知,我諗係無形掌聲嘅力量,所以令我咁堅持。

伍小姐問:小鳳姐,你上一次演唱會叫咩名,你記唔記得?
答:走過順逆流依然金光燦爛。

既然請到小鳳姐出場,現身《蘋果》「人人問小鳳」環節,梗係唔好畀佢停!小鳳姐唱《叉燒包》就唱得多,究竟佢鍾唔鍾意食呢?小鳳姐唱歌時經常不經意咁嘟起個嘴,連盧海鵬都學佢,佢自己又知唔知?

王先生問:點睇現在那麼多年輕人常常「請小鳳姐出來」?
答:我起初很好奇究竟是好還是不好,我依家都想喺度問吓各位,究竟係好呢定係唔好呢,可唔可以答番我?

趙先生問:你鍾意食咩包,蓮蓉包?叉燒包?抑或咩包?
答:依家鍾意食西式嘅叉燒包。即係叉燒餐包,好食呀,你哋都點頭。

黃小姐問:小鳳姐你個「嘟嘟嘴」好經典,唱歌時有甚麼作用?
答:我唔覺喎,我完全唔知自己唱歌時係點,我唔知自己嘟的,我唔係嘟嘟(笑)。

梁小姐問:仍然說笑,儘管這是苦笑。小鳳姐鍾唔鍾意講爛gag架?
答:仍然說笑,儘管這是苦笑,同講爛gag有關係咩?冇喎。呢個係咪爛gag嚟?

楊先生問:甚麼叫每一吋汗水換每一個「盛州」?
答:每一個「成就」,歌詞和旋律如果有些少衝突,聽上去會有些少走音,其實我係啱音。

王先生問:小鳳姐你平時形象高貴,私下會不會做啲搞笑嘢?
答:好高貴咩(笑)?不知點解你會咁樣形容我。我遇到有趣事,我就會記住,幻想他再行前一步會怎樣,其實是自己哄自己開心。

採訪:黃芷蔚
攝影:葉君海、馮峰、吉吉